Населението во Египет се зголемило за 1,6 милиони во 2022 година, објави Централната агенција за јавна мобилизација и статистика, цитирана од весникот „Ал Ахрам”.

Во јануари годинава северноафриканската земја имала 102,8 милиони жители, а во декември тие веќе биле 104,4 милиони.

Во најнаселената област – Каиро, веќе живеат 10,2 милиони луѓе. На второ место е Гиза со 9,5 милиони.

Со сегашните стапки на раст, населението на Египет ќе порасне на 192 милиони луѓе во 2052 година, предвидува извештајот на Агенцијата за статистика. Пресметките покажуваат дека државата треба да ги удвои инвестициите во инфраструктурни проекти и јавни работи.

Во последниве години, египетските власти започнаа неколку кампањи и програми за намалување на наталитетот, одвојувајќи сто милиони египетски фунти (околу 5,2 милиони долари) за обезбедување на контрацептивни средства бесплатно или по намалени цени.