Најскапата нива во Србија продадена за околу еден милион евра
Најскапо платената нива во Србија се наоѓа во околината на Нови Сад, во селото Руменка, а како што соопшти Републичкиот геодетски завод (РГЗ), тоа земјоделско земјиште во четвртиот квартал од минатата година се продавало за 50 евра за метар квадратен, објави Политика.
„Парцелата е со површина од нешто помалку од два хектари, поточно 19.970 метри квадратни, а за неа се платени 998.500 евра. Тоа значи дека еден хектар чини 500.000 евра. Тоа е најскапото обработливо земјиште што кога било е продадено во Србија. До оваа продажба најскапиот хектар се плаќаше по 400.000 евра, а се наоѓаше во Каќ кај Нови Сад“, соопшти РГЗ.
Владимир Рафајловиќ од новосадска агенција за недвижности, наведува дека најверојатно се работи за земјиште кое може да се пренамени.
„Се наоѓа во индустриска зона, а се стопанисува како земјоделско земјиште. Овој вид на земјиште е скапо, бидејќи неговата намена може да се промени. Земјоделското земјиште чија намена не може да се промени е најскапо во Бачка. Скокаат цените и во Срем, каде земјиштето е погодно за лозарство и овоштарство. Во овие области на Војводина има најквалитетно земјиште, па цените се движат од 15.000 до 30.000 евра по хектар. Најевтино е земјиштето во Банат, бидејќи е и со најлош квалитет“, вели Рафајловиќ.
Агроекономистот Милан Простран, пак, оценува дека како што се намалува слободното земјоделско земјиште, се зголемува и неговата цена.