Повеќе од 100.000 луѓе ширум Германија денеска излегоа на протести против екстремната десничарска партија Алтернатива за Германија, откако се дозна дека членови на АФД разговарале за планови за масовна депортација.

Околу 35.000 луѓе се приклучија на повикот под слоганот „Обрани ја демократијата – Франкфурт против АФД“, марширајќи во финансиското срце на Германија. Сличен број, со натписи како „Нацистите надвор“, демонстрираа во северниот град Хановер.

Протести беа одржани и во Брауншвајг, Ерфурт и Касел и во многу други градови. Севкупно, од вчера се одржани демонстрации на околу 100 локации низ Германија, а во Берлин се закажани за утре.

Бранот на мобилизација против екстремно десничарската партија беше поттикнат од извештајот на 10 јануари на истражниот медиум Коректив, кој откри дека членовите на АФД разговарале на состанок за протерување на имигрантите и „неасимилираните граѓани“. Не се потврдени извештаите дека на состанокот присуствувале и двајца членови на Христијанско-демократската партија на поранешната канцеларка Ангела Меркел.