Проширувањето на коловозните ленти наместо да го олесни сообраќајот и да ја намали гужвата, тоа придонесува кон зголемување на бројот на возила кои се користат а сето тоа пак влијае врз зголемувањето на нивото на бучава, загадување на воздухот и проблеми со паркингот, сметаат од иницијативата „На точак “.

Затоа според велосипедистите, решението на метежот не се нови ленти за автомобили.

Повеќето проширувања на коловози времено го олеснуваат користењето автомобил, го прават побрзо во првите години, додека луѓето не создадат нови патерни на движење, на работење и живеење подалеку, имање активности подалеку итн., бидејќи мрежата тоа го дозволува. Со други зборови, ширењето на коловозите поттикнува правење подолги патувања и повеќе километри со автомобил и го зголемува времето поминато во автомобил, а со тоа и загадувањето, бучавата, ефектот на климата, квалитетот на живот. А, да, го зголемува и проблемот со паркингот, бидејќи повеќе луѓе се одлучуваат за автомобил за поголем број патувања – објаснуваат велосипедистите.

Според нив, решението се т.н. комплетни соседства каде потребностите за секојдневниот живот (пазар, продавници, услуги, градинка, училиште, спортски терени, квалитетни јавни простори, паркови) се лоцирани на блиски пешачки и велосипедски растојанија до секого.

Решението на метежот се комлетни улици кои ќе овозможат да се користат рамноправно сите начини на превоз: пешачење, возење велосипед и тротинет, користење јавен превоз, користење автомобил. Може да се рече и дека всушност, метежот не е проблемот.Проблемот е структурата на градот. Проблем е што ни фалат функции и квалитетни простори во соседствата. Проблемот е што уличниот простор не е праведно распределен. А метежот ќе постои се додека постојат градовите. Прашањето е дали сакаме метеж од пешаци и велосипеди, жив јавен простор и силн јавен превоз или метеж од автомобили. Прашањето е дали сакаме метеж во 2 ленти за автомобили или метеж во 6 ленти за автомобили – се интересираат велосипедистите од иницијативата „На точак“.