Секторот за информатичка технологија при Министерството за внатрешни работи изработил дигитална платформа за размена на податоци за објавување на изгубени или украдени документи кои треба да бидат објавени во Службен весник.

Наместо досегашната практика на размена на податоци помеѓу МВР и Службен весник по пат на електронска пошта, информациите ќе се пренесуваат преку национална платформа за интероперабилност, што е дел од потпишаниот договор помеѓу МВР и Службен весник.

„Со овој унапреден начин на работа, Службен весник на дневно ниво автоматски ќе ги презема пријавените изгубени или украдени документи, со цел нивно објавување за неважечки документи. По нивното објавување, МВР на ист начин, преку националната платформа за интероперабилност, автоматски ги презема објавените неважечки документи од страна на Службен весник и ги ажурира во интерниот систем, со цел граѓаните побрзо да извадат нов документ“, соопшти МВР.