Му престана пратеничкиот мандат на Рамчиловиќ, заминува за амбасадор во Црна Гора
На Зеќир Рамчиловиќ му престанува пратеничкиот мандат бидејќи заминува за амбасадор во Црна Гора, констатира претседателот на Собранието Талат Џафери на денешната собраниска седница.
Тој информира дека за престанокот на мандатот на Рамчиловиќ, Собранието ќе ја извести Државната изборна комисија за таа да го предложи следдниот пратеник.
Рамчиловиќ на изборите настапи на кандидатската листа на СДСМ и коалицијата, за потоа да стане независен пратеник. По ова Џафери ја прекина собраниската седница и дополнително ќе информира за нејзиното продолжение.
ДИК во 13 часот ќе одржи седница на која се очекува да биде констатирано дека Даниела Стојановска – Пановска, професорка во средно училиште, е следна од листата на СДСМ и коалицијата во Изборната единица 3 и треба да го замени Рамчиловиќ.
Според информациите од Собранието, се очекува 99. пленарна седница да продолжи по добивањето на информацијата од ДИК за новиот пратеник.