Со воведување санкции за обичните Руси кои патуваат во ЕУ, Брисел сака да постави нова железна завеса на континентот, соопшти руското Министерство за надворешни работи.

-Забраната за директни летови, заострувањето на визната политика, а сега и проширувањето и појаснувањето на санкциите, имаат конкретно за цел да им наштетат на обичните Руси со тоа што суштински ќе ги спречат да влезат во Европската унија. Сега е сосема јасно дека сегашното раководство на ЕУ има намера да ја „спушти“ железната завеса со тоа што значително ќе ја ограничи способноста на луѓето да комуницираат меѓу себе – се вели во соопштението на Министерството, пренесуваат светските агенции.

Министерството предупреди дека поединечните земји-членки на ЕУ нема да можат да се кријат зад Брисел и дека ќе продолжат да бидат одговорни за прогонот на руските граѓани. Москва, исто така, ги повика своите граѓани да ги земат предвид сите ризици кога планираат да ги посетат непријателските земји.

Европската комисија овој месец потврди дека запленувањето на автомобили и други лични работи донесени од руски државјани е во согласност со санкциите наметнати на Москва во 2014 година и проширени по воената операција на Русија во Украина, која беше започната во февруари 2022 година. Ограничувањата, кои се однесуваат и на туристите и луѓето што се движат од Русија, имаат за цел значително да ја ослабат економската база на Русија, се вели во извештајот.

Неколку земји од ЕУ ветија дека строго ќе ги применат новите упатства за санкции.

-Тоа значи дека ниту еден патнички автомобил регистриран во Русија нема да може да влезе на територијата на Полска- изјави во саботата полскиот министер за внатрешни работи Мариуш Камински.

Москва ги критикуваше ограничувањата како дискриминаторски и расистички. Портпаролката на МНР Марија Захарова изјави дека едноставно нема оправдување за конфискација на имотот на обичните граѓани.

Терминот „железна завеса“ измислен од Винстон Черчил се користел за да се опише политиката на Советскиот Сојуз и неговите сојузници во Европа, кои сериозно го ограничиле движењето на нивните граѓани на Запад.