Морачанин: Го губиме нашето богатство бидејќи нема политичка воља тоа да се зачува
Еден од најголемите проблеми е проблемот со неотстранување на дивоградбите. Гледаме дека Општина Охрид сега нешто превзема на крајбрежјето, најавуваат дека дивоградби ќе се отстрануваат и во централното градско јадро, но навистина помина премногу време, реагира претседателката на ДОМ Маја Морачанин по најновиот извештај на УНЕСКО.
– И не само УНЕСКО, еве и во извештајот на Државниот завод за ревизија стои дека во последниве десет години ниту една дивоградба во Струга не е отстранета. Се прави регистарот на дивоградби ама не е целосен, бидејќи нема политичка волја да се решава овој проблем. Извештајот само го констатира она што било евидентно во 2017, а тоа е дека не се справуваме со проблемот со дивоградби онака како што е неопходно. Препораките на УНЕСКО мораат да се спроведуваат бидејќи се работи за наше заедничко добро, вели Морачанин за Слободен печат.
Според неа, не е проблемот само тоа што Охрид ќе влезе на листата на природно и културно наследство во опасност, пострашно е што ние за нас не сме успеале да го зачуваме тоа богатство.
– Не е дека дивоградбите му пречат на УНЕСКО, поважно е дека тие му пречат на езерото, на регионот. Еве, видовме дека тие дивоградби на поединци им носеле и огромна финансиска полза на штета на природата и на јавниот интерес. Светските трендови не се повеќе во насока на масовен туризам туку токму она што Охридскиот Регион го нуди – недопрена природа и автентичен амбиент, културна понуда, гастрономијата. Аргументите дека ќе го изгубиме туризмот во охридскиот регион се неосновани, вистината е дека ние ќе ги загубиме туристите ако го загрозиме неговиот УНЕСКО статус, бидејќи огромно мнозинство од туристи доаѓа тука токму поради тоа што Охрид и целиот регион се меѓу 30-те места на земјината топка каде има толкаво и природно и културно богатство па тој е заштитен и по двата основа! Имаме такво непроценливо природно и културно богатство, а поради бизнис интереси на неколкумина конкретни поединци во општините и поради немањето политичка волја ризикуваме да останеме без тоа богатство иако, во краен случај тоа, на подолг рок ќе се одрази и на финансиските приходи во истите тие општини – посочува Морачанин.