В петок од 17.00 часот во рамките од второто коло во Првата македонска фудбалска лига на Градскиот стадион во Кавадарци, ГФК Тиквеш ќе го пречека Вардар.

На стартот од шампионатот Вардар убедливо дома со 4:1 го совлада вечниот ривал Пелистер, додека ГФК Тиквеш како домаќин ремизираше без голови (0:0) со Работнички.

Тренерот на ГФК Тиквеш, Ѓорѓи Мојсов и неговите играчи го почитуваат ривалот:

– Натпревар како и секој друг. Го респектираме Вардар, знаеме против кого играме. Против Работнички не го игравме нашиот фудбал, односно ја немавме нашата доминација. Утре е сосема друг натпревар, ние сме подготвени и мислам дека знаеме како да дојдеме до првата победа. Ме радува што публиката и Лозарите секогаш се тука да ни дадат поддршка – вели Мојсов.

Во изминатиот период ГФК Тиквеш ангажираше ново засилување, Нигериецот Сандеј Алими кој игра на позицијата десно крило потпиша договор на две години.