Миркуловски за ветераните: Не ни беше тешко да се воиграме, заедно сме биле 10-15 години
Денес се одигра ревијален натпревар помеѓу актуелните и поранешните репрезентативци на Македонија, а на крајот победа славеа актуелните репрезентативци со 25:21.
Натпреварот изобилуваше со атрактивни потези. Големиот борец на Македонија, Филип Миркуловски во изјава за МРТ додека се играше на натпреварот порача дека во овој дуел има само еден победник, а тоа е народот.
„Некој да ми кажуваше дека ќе се случи ваков натпревар, вака добро организиран и да изгледа вака убаво. На крајот ќе има еден победник, народот кој покажа големо срце, ја исполни салата за да бидат донирани средства на оние на кои им се многу потребни, децата од СОС Детско село“, изјави Миркуловски.
На ветераните не им било тешко да се воираат.
„Не ни беше тешко да се воиграме, ние бевме 10-15 години заедно. По кратко време ни стана јасно која каде треба да трча, кој каде да додава…“, истакна Миркуловски.
Ќе потсетиме средствата собрани од денешниот натпревар ќе бидат донирани во СОС Детското село.