Михајловски: Очекувам од Владата, институциите, градот, да го помогнат овој проект на Вардар1961
Денеска РК Вардар1961 ги претстави новите дресови за сезоната 2021/2022, а воедно беа споделени очекувањата пред следните предизвици.
Препорачано
Претседателот на клубот, Михајло Михајловски имаше важна информација која сакаше да ја сподели пред медиумите и јавноста дека натпреварот од четвртфиналето во СЕХА лигата против ППД Загреб од Хрватска може да се игра со присуство на публика.
Поточно на мечот закажан на 26 август во СЦ „Јане Сандански“ – Скопје може да присуствуваат 1000 гледачи, но само со почитување на мерките кои ги донесе Владата во борбата против ковид-19.
Денеска ракометниот клуб Вардар одржа прес-конференција, на која ги претстави новите дресови и ги истакна плановите за новата натпреварувачка сезона.
– При влез во салата освен лична карта ќе биде задолжително и поседување, приложување и проверка на сертификат/потврда за извршена вакцинација, односно примена најмалку прва доза вакцина против заразната болест ковид-19 или сертификат/потврда за прележан ковид-19 во последните 45 дена – рече Михајловски.
Воедно првиот човек на клубот изјави дека клубот дополнително ќе се изјасни дали ќе можат да се набават посебни билети за овој натпревар, или ќе се влегува само со лична карта и горенаведените протоколи.
– Боли поразот од Е. Пелистер во Суперкупот на Македонија, но тоа не нè загрижува многу. Имаме доста нови играчи, екипата треба да се воигра, така што одиме напред. Одигравме доста квалитетно на струшкиот турнир каде што го освоивме првото место. Продолжуваме со подготовки, одиме сега во Магдебург на „Хумел купот“.
Претходно имавме еден хендикеп и нервози кога ЕХФ соопшти дека е условен нашиот настап во Лигата на шампионите поради стари обврски на Вардар кои ги имаше спрема играчите. Има тројца играчи кои пријавиле во ЕХФ и од тука потекнува целата историја. Морам да кажам дека ЕХФ инсистираше на некоја нивна идеја, конзервативна, неприфатлива да се депонира милион евра и тие стојат на сметка на ЕХФ ако некој тужи, добие, и од тоа се исплатува.
Во директни контакти со челниците на Европската ракометна федерација се договоривме, и Сергеј Самсоненко до дадениот рок сè ни обезбеди. Плативме, се исплатија играчите по 700.000 евра, додека останатите 300.000 евра се како депозит кои стои, односно тие може да се искористат. Мојата функција, улога беше во тие преговори беше начинот да се смени плаќањето за овие средства, а за останатото си е задолжен Сергеј Самсоненко, кој обезбеди средства, така што играчите се исплатени.
Остатокот од долгот спрема другите играчи ќе се исплати до крај на календарската година. И така, нема повеќе условување дали Вардар ќе игра или не во Лигата на шампионите.
Но, тоа ни направи проблем затоа што потенцијалните спонзори, и од ланската година кои беа спонзори чекаа да се разреши овој проблем со ЕХФ, и после почнеме да преговараме. Сето тоа нè успори во нашите намери, во нашите конкретни договарања за спонзорирање на Вардар.
Бидејќи сега имаме чист терен пред себе, за натпреварување, јас еве го користам овој прес со апел до сите досегашни спонзори да се обнови договорот, а и за нови потенцијални спонзори кои треба да го помогнат Вардар.
Вардар1961 ги промовираше новите дресови за сезоната 2021/2022
Сепак сме ние од јавен интерес, да не се заборави Вардар е двократен европски шампион, најдобра екипа во државата, во било кој спорт, и очекувам структурите од Владата, одредени институции, од градот, општините и некои државни јавни претпријатија да се помогне овој проект и тоа што сме го зацртале да го оствариме. Наша цел е да се влезе меѓу најдобрите осум во Европа, да играме финале во СЕХА, целта е да се освои и првенството и Купот на Македонија – вели Михајловски.
