Мицкоски: Дескоска е пречка за договор за Законот за СЈО!
Планот – Б за начинот на донесување на Законот за јавното обвинителство е правно погрешен, оценува претседателот на опозициската ВМРО-ДПМНЕ, Христијан Мицкоски. На новинарско прашање за време на денешната прес конференција, во врска со изгледите да се најде решение за овој закој, со кој се регулира и статусот на Специјалното јавно обвинителство, Мицкоски рече дека основната пречка за договор меѓу власта и опозицијата е министерката за правда, Рената Дескоска, чија единствена цел било, како што кажа, пресметка со ВМРО-ДПМНЕ.
Запрашан дали неговата партија размислува за флексибилност во врска со црвените линии во преговорите, Мицкоски дециден:
„Нема компромис со правото!“
Лидерот на опозициската ВМРО-ДПМНЕ оцени дека со предлог законот со кој што државата ќе ги плаќа придонесите за пензиско-инвалидско осигурување ако работодавачот го зголеми примањето за дополнителни 6.000 денари владејачката СДСМ и премиерот Зоран Заев прават директен упад во законите и Уставот.
Според Мицкоски, мерката е за продолжување на политичката кариера на Заев и неговите соработници, а работниците нема да добијат зголемени примања.
– Ова е чиста статистичка операција за да ја подобри страшната цунами политика на СДСМ, затоа што работниците 100 – те евра, што до сега ги добивале на рака од работодавачите кои не го почитувале законот и работеле спротивно на законот, сега ќе ги добиваат жирално на сметка, а придонесите ќе ги плаќате вие, рече Мицкоски.
Тој ги критикуваше состојбите во економијата потенцирајќи дека не се оствариле најавите на власта за економска офанзива и за економска година.