Третиот тенисер во светот, Данил Медведев денеска се пласираше во второто коло на „Вимблдон“, откако во три сета го совлада Британецот Артур Фери со 7:5, 6:4, 6:3. До победата над 391 играч на светот рускиот тенисер стигна по два часа и четири минути игра.

Медведев шестпати му го одзема сервисот на противникот, дозволувајќи му два брејка. Во второто коло Русинот ќе игра против подобриот од мечот Адријан Манарино (Франција) – Александар Шевченко (Русија).

Пласман во второто коло обезбедиа Американецот Френсис Тиафо кој со 7:6 (4), 6:3 и 6:4 го елиминираше Кинезот Јибинг Ву. Григор Димитров од Бугарија убедливо со 6:1, 6:2 и 6:1 го совлада квалификантот од Јапонија, Шо Шимабукуро.

Настапот го заврши Шпанецот Роберто Баутиста-Агут кој загуби од Русинот Роман Сафиулин со 3:2 во сетови, а со истиот резултат Тејлор Фриц (САД) беше подобар од Јаник Ханфман.

Во женска конкуренција изненадување приреди Украинката Марта Костјук која со 0:6, 7:5 и 6:2 триумфираше над осмата носителка на турнирот, Марија Сакари од Грција.

Првата носителка Ига Швјонтек од Полска со 6:2 и 6:0 ја елиминираше Сара Сорибес Тормо од Шпанија и во следното коло ќе се соочи со подобрата од дуелот Диан Пари (Франција) – Петра Мартиќ (Хрватска).