Рускиот тенисер Данил Медведев е поразен во второто коло на Мастерс турнирот во Мајами, САД. Моментно осмиот играч во светот Медведев претрпе убедлив пораз од Шпанецот Хауме Мунар, 56-ти на АТП-листата, со резултат 6:2, 6:2.

Медведев е далеку од својата најдобра форма оваа сезона, иако неодамна стигна до полуфиналето на Индијан Велс.

Беше фаворит во мечот против Мунар, нивната прва средба, но не можеше да направи апсолутно ништо.

Медведев до последниот гем немаше ниту една брејк топка, а Мунар се пласираше понатаму и сега го чека пресметка со победникот од мечот Монфис-Лехечка.

Своето учество во Мајами го заврши и Австралиецот Ник Кирјос кој со 7:6 (5) и 6:0 е елиминиран од Русинот Карен Хачанов кој во третото коло ќе игра против Григор Димитров.