Во шестата епизода на „Мамавизија“ наши гостинки се две хероини, мајката Оливера Савеска и ќерката Марија Савеска. Марија е 23-годишна девојка која живее со церебрална парализа. Таа е позната за пошироката јавност како Пепелашка од првата инклузивна претстава на Балканот. И покрај тоа што живее во количка и едната рака не ѝ е во функција, таа е полна со енергија и често е на големата сцена каде што настапува како пејачка или актерка.

Оливера и Марија за првпат пред јавноста зборуваат за нивната животна приказна. Оливера се охрабри да раскаже како изгледа нејзиниот живот откако станала мајка на детенце со попреченост.

-Денешната состојба на Марија ја припишувам на лекарска грешка. Кога бев бремена во 31. гестациска недела, се јави проблем со бебето. Откако ме примија во болница, се чудев, бидејќи имаше една невообичаена атмосфера, беше тивко. Подоцна разбрав дека претходната вечер славеле, имале некаква прослава. Сестрата којашто дојде да ја запише анамнезата буквално лежеше поспана на мојот кревет додека ги заведуваше податоците на листот. Тогаш таа направила грешка, наместо да напише јасно 31. гестациска недела, единицата ја напишала развлечено така што наликува на седмица. Сè до породувањето ме воделе како да сум 37. недела и покрај тоа што упорно им велев дека сум 31. недела во бременоста. Пред да ме породат ми признаа – отворено за „Мамавизија“ раскажува Савеска.

Марија и покрај тоа што знаела дека мајка ѝ поминала низ тешкотии за време на бременоста и породувањето, додава дека не ги знаела деталите и дека во оваа емисија и таа за првпат слуша низ што поминала нејзината мајка за таа да дојде на свет.

Целата емисија „Мамавизија“ премиерно ќе се емитува вечерва со почеток во 20 часот на јутјуб-каналот на „Слободен печат“.

Водител и автор на емисијата е Александра Вуксановиќ.

МАМАВИЗИЈА ЕП06 | Савеска: Марија немаше да заврши во количка, но се случи лекарска грешка