Јавен обвинител од Основното јавно обвинителство Скопје поднесе Барање за поведување подготвителна постапка против 17-годишник осомничен за обид за убиство, кривично дело предвидено во член 123 став 2 точка 2 во врска со член 19 од Кривичниот законик.

Според информациите на Јавното обвинителство, малолетникот во својот дом на улицата „Христијан Тодоровски Карпош“ во Скопје извршил семејно насилство врз својот татко. Додека таткото се наоѓал во спалната соба, синот му пришол одзади и со остар предмет му нанел десет убодни рани.

Мајката, која била во близина, успеала да го оттурне синот и веднаш повикала итна медицинска помош. Таткото бил пренесен во Клиничкиот центар „Мајка Тереза“, каде по оперативен зафат се наоѓа во животозагрозувачка состојба.

Обвинителството побарало и определување мерка притвор за малолетникот.