Љубе Бошкоски бара да се ослободи Горан Стојков
Партијата на поранешниот министер за внатрешни работи Љубе Бошкоски, Обединети за Македонија, бара ослободување на екскомандантот на единицата „Лавови“, Горан Стојков.
Од Обединети за Македонија за апсењето на поранешниот командант на расформираната полициска единица велат дека се „крајно изненадени од двојните аршини“ и оти тоа „асоцира на селективност“.
„Апелираме до правните лица кои го водат случајот, истиот да биде отворен повторно, бидеќи процесот е започнат во 2013 година за време на режимското владеење на бегалецот Груевски. Не смееме да дозволиме ниту еден бранител и патриот да ги трпи последиците од едно режимско владеење“, стои во дописот од Обединети за Македонија.
Стојков беше уапсен вчера. Тој бил баран за одлежување на една година казна затвор за дело од 2001 година.
Стојков во 2016 одлежа затворска казна од три години и три месеци за случајот „Шпион“.