Литванија и САД потпишаа план за одбранбена соработка до 2028 година
Документот го потпишаа директорот на воениот оддел за одбранбена политика, Ваидотас Урбелис и советничката на секретарот за одбрана на САД за меѓународна безбедност, Селест Валандер.
Литванија и САД во Вашингтон потпишаа нов план за билатерална соработка во областа на одбраната за периодот 2024-2028 година, соопшти Министерството за одбрана. Документот го потпишаа директорот на воениот оддел за одбранбена политика, Ваидотас Урбелис и советничката на секретарот за одбрана на САД за меѓународна безбедност, Селест Валандер.
Урбелис нагласи дека Литванија и САД се сојузници кои делат иста проценка за заканите по меѓународната безбедност и тесно соработуваат за зајакнување на одвраќањето во балтичкиот регион. Според него, одбранбената соработка меѓу земјите е „квалитативно проширена“ во последните години.
„Имаме континуирана ротација на американскиот баталјон во Пабрада, интензивно ја подобруваме инфраструктурата за да обезбедиме воено присуство на сојузниците, вклучително и САД. Зголемена е набавката на воена опрема од САД – реализираме повеќе од 60 проекти за набавка на потребната опрема: артилериски системи HIMARS, оклопни теренски возила JLTV, противтенковски ракетни системи Javelin“, пренесува телевизијата ЛРТ, пишува белградска Политика.
Урбелис додаде дека во рамките на билатералната соработка се реализираат и други амбициозни проекти во областа на сајбер способностите и други области. Според него, потпишаниот документ покажува дека „Американците остануваат посветени на активна работа во балтичкиот регион и со тоа зајакнување на одвраќањето“.
Првиот план за одбранбена соработка меѓу Пентагон и литванското Министерство за одбрана беше потпишан во 2019 година.