Во неделата, изминатиов викенд за време на полициски час, полицијата во близина на мостот кај Железничка станица привела петмина што биле претходно пријавени за гласна музика.

Од МВР велат дека на 7 јуни, околу 18 часот и 30 минути позади објектот на ПИОМ на кејот покрај реката Вардар, од полициски службеници од Полициската станица Аеродром, биле преземени мерки и активности по пријава од граѓанин за констатирани прекршувања на полицискиот час од група на граѓани кои биле собрани на јавно место и го нарушиле јавниот ред и мир со пушање гласна музика.

Од полицијата велат дека пет лица најнапред дрско се однесувале кон полициските службеници по што физички ги нападнале, а едно од нив фрлило со камен кон полициското комбе. Поради постоење основи на сомнение за сторено кривично дело „непостапување според здраствените прописи за време на епидемија“ и сторен прекршок „омаловажување на полициски службеник“, од слобода биле лишени А.Б.(27), А.М. (23), А.А.(30), Е.А.(30) и Х.Ј.(44), сите од Скопје.

За омаловажувањето на полициските службеници, на петмината лишени од слобода, поднесени им се записници за констатиран прекршок согласно член 13 од Законот за прекршоците против јавен ред и мир, додека поради непочитување на полицискиот час и препораките на Владата за справување со пандемијата на Ковид 19, со што е сторено кривично дело, по комплетирање на документацијата ќе им биде поднесена кривична пријава согласно член 206 од КЗ.