Ако сте навикнати да го започнувате утрото со туширање, можеби е време да размислите за промена на вашата рутина. Според мислењето на лекарите, туширањето наутро, иако може да ви ги разбуди сетилата, можеби не е најдобриот избор за вашата кожа, сон и здравје.

Д-р Џузепе Арагона тврди дека во текот на денот на телото и косата се наталожуваат алергените во воздухот, нечистотијата, потта и разни иритации, особено во пролетните и летните месеци, кога има поголема концентрација на полен во воздухот и кога повеќе се потиме. Ако не се истушираме навечер, целата таа нечистотија се пренесува во постелнината.

„Ова не само што придонесува за валкани чаршави и можни ноќни алергии, туку може да предизвика и иритација на кожата, чешање, сувост, па дури и акни поради маснотијата и нечистотијата што остануваат на навлаката за перницата и чаршафите“, изјави д-р Арагона за британски „Гламур.УК“.

Со него се согласува и д-р Џејсон Синг, кој на социјалната мрежа ТикТок објасни како вечерното туширање може да го подобри квалитетот на сонот, да ја исчисти кожата од загадувањето и да помогне во нејзината хидратација. Имено, топлиот туш го поттикнува лачењето на мелатонин, хормон кој му сигнализира на телото дека е време за спиење.

„Во текот на вечерта, телото природно почнува да се лади, што е дел од подготовката за спиење. Топлиот туш и последователното сушење со пешкир го имитираат овој процес и го олеснуваат заспивањето“, објаснува д-р Синг.

Неговите тврдења се поткрепени и со мета-анализата од 2019 година, која опфатила 17 студии. Студијата покажала дека вечерното туширање со топла вода (помеѓу 40 и 42,5 степени Целзиусови) значително го подобрува квалитетот на сонот. Вечерниот туш е особено корисен за луѓето со чувствителна или сува кожа, акни или егзема. Тогаш, вели д-р Синг, кожата е повеќе склона кон регенерација и подобро ја задржува влагата, што значи дека со туширање во овој период од денот, можете да го стимулирате природното закрепнување на кожата.

Секако, утринскиот туш не е бескорисен, особено ако сакате да се освежите по потењето или да ја подобрите утринската хигиена. Меѓутоа, кога станува збор за нега на кожата и квалитетот на сонот, вечерниот туш сепак има предност.