Легнуваат каматите на националните обврзници во Хрватска
Сопствениците на националните обврзници во петок ќе ја добијат првата камата на нивните сметки, а до крајот на месецот на хрватските граѓани ќе им биде понудена нова емисија на државни обврзници со малку подолг рок на доспевање.
Денеска помина една година од издавањето, а на граѓаните ќе им биде исплатена првата камата со што ќе се донесе принос од 3,65 отсто од вложениот износ. Така, на пример, оние што платиле минимум 500 евра ќе добијат 18,25 евра, а оние што платиле 10.000 евра ќе бидат побогати за 365 евра, објави Н1 Хрватска. Како што информираше во четвртокот Министерството за финансии, се исплаќаат вкупно 67,5 милиони евра заостанати камати, од кои 48,7 милиони евра на граѓаните, а останатиот дел на институционални инвеститори.
Министерот за финансии Марко Приморац истакна дека минатогодишната емисија на „народни“ обврзници претставува најголема инвестиција на физички лица во една хартија од вредност издадена преку јавна понуда во историјата на хрватскиот пазар на капитал. Околу 45.000 граѓани се запишале и платиле за обврзниците, а како што оцени министерот, големиот одзив е порака за високата доверба на граѓаните во хартиите од вредност што ги издава државата.