Рускиот министер за надворешни работи Сергеј Лавров може да отпатува во земја на ЕУ или во Северна Македонија, и покрај тоа што е на европската листа на санкции наметнати на Русија поради војната во Украина. Ова го потврди портпаролот на Европската комисија во врска со информациите дека Лавров оваа недела ќе учествува на состанокот на Организацијата за безбедност и соработка во Европа (ОБСЕ) во Скопје, пренесува бугарската агенција БТА.

Портпаролот објасни дека оние кои се погодени од санкциите имаат право да патуваат, особено кога нивното патување е поврзано со причината поради која се санкционирани. Лавров е санкциониран, но санкциите предвидуваат исклучоци од учество на меѓународни состаноци, посочи тој.

-Земјите од ЕУ можат да дозволат прелетување на авионот на Лавров, како и властите во Скопје да издадат дозвола за слетување и учество на состанокот, тоа нема да биде прекршување на санкциите. Ова ќе ни даде можност да застанеме очи во очи со Лавров и да разговараме за лагите што тој ги шири, додаде портпаролот.

Според него, на ваквите средби ЕУ може да ја претстави својата визија, а санкционираните да одлучат да го променат своето деструктивно однесување.

Портпаролот не можеше да потврди дали високиот претставник на ЕУ за надворешна политика и безбедност Жозеп Борел ќе присуствува на состанокот на ОБСЕ поради неодамнешните настани на меѓународната сцена. Планирано е Борел да патува барем на дел од состаноците, а доколку не успее, ЕУ да биде претставена на соодветно ниво, прецизираше портпаролот.