Од првиот ден на независноста Македонија работи на дигитализацијата и 30 години потоа земјава е предводник во регионот во сегментот на телекомуникациите и поврзувањето, рече премиерот Димитар Ковачевски во обраќањето на Талинскиот дигитален самит 2023 во Естонија.

– Кај нас моментно 83 отсто од домаќинставата имаат пристап до широкопојасен интернет, а 91 процент од компаниите користат различна технологија и широкопојасен инренет – се пофали Ковачевски.

Тој во обраќањето кажа дека пред 30 години земјава ја иницираше и ја изгради дигиталната Трансбалканска линија со операторите од Турција, Бугарија, Албанија и Италија, обезбедувајќи комукникациско поврзување Исток – Запад.

– Со тоа ја отворивме вратата за широка соработка на економиите. Но, не сопревме тука. Ја поддржавме решеноста да изградиме оптика за секој дом. Лидери сме и во воведувањето на 5Г технологијата на пазарот. Создадовме инфрастурктура за дигитално поврзување. Ги елиминиравме и трошоците за роаминг во регионот, правејќи чекор напред кон ЕУ – додаде премиерот Ковачевски.

Тој уште кажа и дека земјава годинава ја воведе АДА, првиот асистент за вештачка интелигенција што им помага на компаниите при аплицирањето за владина поддршка.

– Само во првите 48 часа од воведувањето, АДА опслужи над 1.300 граѓани. Во процес сме на формирање агенција за дигитализација за брза и ефиаксна дигитална трансформација која ќе биде фокусирана на четирите столба: сајбер безбедност, ИТ инфраструктура, софтверски решенија и академски дел, подвлече Ковачевски.

Инаку, на Талинскиот самит учествуваат лидери на држави, претставници на ЕУ, телекомуникациски и tech компании и граѓански организации. Клучните теми на кои ќе се разговара на самитот се предизвиците и можностите во дигиталната ера, како и освежување на агендата на демократијата и технологијата, исцртувајќи го патот кон посилна отпорна, респонзивна и отворена иднина. Целта на Самитот е суштински придонес кон глобалниот дискурс околу градењето на отпорни модерни демократии.

Според најавите, Ковачевски во Талин, во рамки на учеството на Самитот ќе има билатерална средба со премиерката на Естонија, Каја Калас.