Ковачевски повика на внатрепартиски избори: Добро да размислиме што направивме во последните четири години
Претседателот на СДСМ, Димитар Ковачевски вечерва на прес-конференција ја честиташе победата на изборниот конкурент ВМРО-ДПМНЕ на Парламентарните избори, како и победата на претседателскиот кандидат Гордана Сиљановска-Давкова.
– Денешниот резултат е разочарувачки. На СДСМ му е зададен тежок удар, не само од граѓаните, туку и од симпатизерите на партијата. Во наредниот период ќе ги анализираме резултатите, не сакам да носам избрзани заклучоци и да посочувам виновници. И јас и партиското раководство имаме одговорност и заедно ќе мораме да поминеме низ овој процес. Треба добро да размислиме што направивме и кои беа слабостите во последните четири години, порача Ковачевски.
Претседателот на партијата најави дека се потребни внатрепартиски избори, почнувајќи од раководството.
– Повикувам на внатрепартиски избори, почнувајќи од раководството, па се до претседателите на општинските организации и сите органи и тела. Органите на партијата ќе одлучат прецизно за времето и начинот на спроведување на овие постапки, додаде тој.
Според Ковачевски, СДСМ и коалицијата мора да бидат силна и одговорна опозиција.
– Водев сметка да не наштетам на државните интереси. Затоа и се одлучив сега откако завршија изборите да ја кажам вистината со која живеам веќе 2 години. Вистината е дека актуелниот систем во кој живееме, води повеќе сметка за ПР-от отколку за суштината, за површината отколку за длабината и граѓаните со право се незадоволни и не веруваат во ништо. Многуте кризи придонесоа многу граѓани да се иселуваат и да немаат верба во државата. Корупцијата на секое ниво, личните интереси, долгата европска интеграција, непотизмот, бизнис интересите, етничкиот професионализам, се само дел од крупните дефекти на системот што ја јаде државата и кој мора конечно да се промени, порача Ковачевски.
На прашањето дали ќе поднесе оставка од функцијата претседател на партијата, Ковачевски не даде одговор.