Кој пукаше во „Цар Борис“, полицијата засега без одговор, случајот не бил едноставен
Охридската полиција работи на случајот со нападот со огнено оружје на бугарскиот културен клуб „Цар Борис“, како и на случајот со нападот со тврди предмети од пред три дена, а сторителите засега не се пронајдени, вели портпаролот на СВР Охрид Стефан Димоски за „Слободен печат“. Тој вели дека полицијата чека насоки од Јавниот обвинител како да постапува понатаму во случајот.
– Синоќа околу 19 часот и 12 минути беше пријавено во полиција, веднаш е излезно на терен од каде се собрани материјални траги во соработка со јавен обвинител. Се разгледуваат собраните докази и чекаме насоки од Јавното обвинителство во која насока натаму да се движи истрагата – вели Димоски за „Слободен печат“.
Во врска со објавите на бугарските медиуми дека има видео-снимка од синоќешниот напад на која се гледа како пукачот пристигнува на местото со автомобил, излегува од возлото и го испразнува пиштолот кон клубот, Димоски вели дека се собрани сите материјални докази.
– Сѐ ќе се провери – вели тој.
На прашањето дали се пронајдени сторителите кои пред три дена со цврсти предмети го искршија стаклото на клубот, Димоски одговори негативно.
– Се работи на случајот, кој не е едноставен. Имаме многу разни околности што треба да се истражат во моментов, а во контекст на нападите на клубот – вели Димоски.
СВР Охрид синоќа информира дека околу 19 часот и 12 минути било пријавено оштетување на стаклото на канцеларијата на здружението „Цар Борис Трети“, лоцирана на булеварот „Македонски Просветители“ во трговскиот центар Амам во Охрид.
– Полициски екипи при СВР Охрид излегоа на местото на настанот при што е утврдено дека на стаклото од надворешната врата и стаклото од излогот на канцеларијата има две оштетувања направени од оружје – изјави синоќа Димоски за МИА.
Синоќешниот напад е трет врз клубот „Цар Борис“ откако беше отворен на почетокот на октомври, под силно полициско обезбедување и со протест на револтираните охриѓани. Прво му беше искршена таблата, а пред три дена клубот беше каменуван.