Германската Луфтханза планира да бара компензација од групата за климатски активисти, „Ласт Џенерејшн“, поради протестите што ги прекинаа летовите на неколку германски аеродроми претходно овој месец. Портпаролката рече дека компанијата планира да бара компензација во име на сите авиокомпании во групата, која ја вклучува германската Луфтханза, како и Аустриан ерлајнс, Свис ерлајнс, Брисел ерлајнс и Еуровингс.

Климатските активисти кои сакаат да ја истакнат важноста на влијанието на воздушниот сообраќај врз загадувањето, останаа на пистите на аеродромите во Дизелдорф и Хамбург на 13 јули. Активистичката група претходно организираше сличен протест на аеродромот во Берлин во ноември. Поради овие протести, бројни летови беа откажани или пренасочени. Еуровингс, нискобуџетната компанија во сопственост на Луфтханза, ги обвинува протестите за откажување на 55 летови. Луфтханза веднаш не коментираше колку пари компанијата ќе бара за компензација.

Експертот за воздухопловство Џералд Висел за весникот „Рајнише пост“ изјави дека тоа би можело да биде милиони евра. Аеродромот во Дизелдорф, исто така, соопшти дека има намера да поднесе свои барања против Ласт Џенерејшн. Членовите на активистичката група кои беа уапсени на аеродромите остануваат под полициска истрага и се соочуваат и со можни граѓански тужби за отштета.