Време е за четвртфиналните натпревари во СЕХА Газпром лигата, Еурофарм Пелистер во вторник со почеток од 18.00 часот во Битола во првите 60 минути од двомечот ќе ги одмери силите со Татран Прешов.

Голманот на македонскиот вицешампион Марко Кизиќ вели дека Словаците имаат добар тим со докажан квалитет во натпреварувањето оваа сезона.

– Има два натпревари и нема да имаме многу време да се подготвиме, но верувам дека ќе бидеме подготвени. Очигледно, ќе се стремиме да победиме на првиот меч. Имаат искусен тим кој заслужува почит за сѐ што направија во досегашниот дел од сезоната, но нашата цел останува иста, а тоа е да го обезбедиме местото на завршниот турнир – вели Кизиќ.

Според тренерот на Еурофарм Пелистер, Александар Јовиќ Татран Прешов има квалитетен тим и сигурно очекува еден тежок натпревар.

– Можам да кажам дека ќе направиме сѐ за да се подготвиме за овој натпревар на најдобар можен начин. Мислам дека ни претстојат два клучни месеци и треба да најдеме начин да ја подигнеме нашата игра за да се обидеме да ја освоиме двојната круна во Македонија и повторно да се бориме за завршниот турнир на СЕХА – Газпром лигата – се зборовите на Јовиќ.