Кинеските инвестиции во Иран се зголемија за 10 пати за една година
Кинеските инвестиции во Иран се зголемени за десет пати во 2023 година во однос на претходната година, потврди иранското Министерство за економија и финансии.
Кинеските инвестиции минатата година достигнаа три милијарди долари и беа 10 пати поголеми од претходната година, изјави заменик-министерот за економија и претседател на Организацијата за странски инвестиции Али Фекри во изјава за агенцијата ИРНА.
Кинескиот капитал главно бил насочен кон проекти од областа на логистиката, инфраструктурата и рударството.
Иран е под санкции на САД и Европската унија поради развојот на неговата нуклеарна програма. Техеран истакнува дека го користи за цивилни цели. Кина е важен економски партнер за Техеран и е главен купувач на иранска нафта. Двете земји потпишаа 25-годишен договор за соработка во 2021 година, забележува германската агенција ДПА.
Од почетокот на мандатот на претседателот Ебрахим Раиси во август 2021 година, Иран привлече 10,6 милијарди долари странски капитал, рече Фекри. Во тој период најмногу капитал вложи Русија, а меѓу позначајните инвеститори, покрај Кина, се и Обединетите Арапски Емирати, Турција, Ирак и Индија, пренесе Хина.