Застаклената тераса, која деновиве беше подигната на просторот пред кафулето „Џовани“ во Лептокарија ќе биде отстранета, затоа што била дивоградба. Ова е решението на Секторот за инспекторат на Општина Карпош, откако деновиве граѓаните кои живеат во близина – посочија дека пред кафулето се заградува просторот.

– Мислам дека и огромен кратер среде Лептокарија да направат Стефан Богоев и Општина Карпош нема да реагираат. Додека ние карантин, другите си тераат по свое, кој каде тера се прошири. Тревните површини низ Лептокарија си ги направија „дворови“, како да им се во наследство дадени. Нас кој не прашува – реагираше жителка на населбата, објавувајќи и фотографии во фејсбук групата „Заедно за заштита на зеленилото во Карпош“.

Но, и покрај обвинувањата на дел од граѓаните, Богоев и Карпош експресно реагираа. Оттаму објаснуваат дека не станува збор за проширување на терасата во тревна површина, туку сите активности се одвивале на постоечката основа за летна тераса на кафулето „Џовани“.

-Застаклен бил просторот што и порано го користеше „Џовани“, но затоа што станува збор за градба, а не за урбана опрема, и за истата нема одобрение од Општина Карпош, денеска, Секторот за инспекторат донесе решение за отстранување на застаклениот дел – велат од Карпош.