Во последниот натпревар на Европското првенство во Истанбул, Турција, за кошаркарки до 16 години, денеска женската кадетска репрезентација на Македонија загуби од Ирска (63:53). Доста изедначен почеток на мечот кој носеше одлука која од двете репрезентации ќе биде подобро пласираната на шампионатот. Десет минути во кои нашиот кадетски тим постигна 10 поени, односно два повеќе во однос на противничкиот.

Во продолжението, половина период од втората четвртина нашите кадетки беа без реализација од поле. Минутите без поени од игра, со тројка (прва за нашиот тим од 13 обиди), ги прекина Трајковска, која ја спречи серијата на Ирска од 12:0, за да намалиме на 22:14. Но не и нешто преку тоа, затоа што противничката селекција направи уште поголема предност, до крајот на првото полувреме Ирска имаше „плус 13“ (29:16).

Период од играта во кој нашите млади кошаркарки загубија дури 19 топки, што е една од основните причини за големата негатива во која влегоа, особено тоа се однесува за втората четвртина која ирската репрезентација ја доби со големи 21:6. Многу поефикасно продолжија нашите кошаркарки во второто полувреме. На средина од третиот период, ја преполовија негативата (31:37). А по поентирањето на Колева, дојдовме на само два поени негатива (41:39).

Но во оние две минути, последни од третата четвртина, Ирска одново се одвои, сега на 46:40. Продолжи серијата на поентирање на Ирска и на почетокот на последната четвртина. Серијата од шест поени ги донесе на двоцифрен вишок (52:40), момент од 34 минута, и го натера селекторот Стојмановиќ да повика тајм-аут. Не донесе некои нови, добри моменти за нашата селекција затоа што Ирска го одржуваше тоа двоцифрено водство, кое им ја донесе и првата победа на првенството.

Најефикасна во нашата селекција беше Колева со 14 поени, додека Трајковска реализираше 13.

Сите резултати на Македонија на ЕП Дивизија Б во Истанбул:

– Македонија – Грција 47:76
– Македонија – Бугарија 62:80
– Македонија – Литванија 43:89
– Македонија – Украина 40:71
– Македонија – Азербејџан 74:68
– Македонија – Ирска 53:63