Македонската јуниорска кошаркарска репрезентација „Под 18“ загуби во првиот натпревар на Европското првенство дивизија „Б“ во Матошинос, Португалија, откако беше совладана од Велика Британија со 68:84.

Британците водеа по првите 10 минути со 17:9, а во 15 минута, Македонија намали на само 19:21, доволно за селекторот на ривалите да побара минута одмор за да го сопре налетот на нашите јуниори и серијата од 10:4. Поените на Луканоски, во 18 минута, ни го донесоа и првото водство (26:25). Но, во последните две минути Велика Британија влезе во своја серија од седум поени, доволно да ја врати предноста (32:26). И на големиот одмор да замине со солидни 34:27.

Британските јуниори подобро почнаа и во второто полувреме, а овојпат беа уште поефикасни, и за само четири минути, обезбедија плус од дури 20 поени (53:33). Немавме одговор за брзата и ефикасна игра на противникот, кој зголеми и на максимални 56:33, за серијата да изнесува 22:6.

Шошкиќ, со тројка, го прекина тој далеку од идеален период на нашата селекција, која за разлика од првото полувреме, остана без дефанзивни решенија за играта на Британците. Јаничиќ, со лесно положување и една неверојатна тројка од осум метри, со помош на Луканоски, ја симнаа негативата на многу пониски 47:58. Не успеавме негативата да ја сведеме на едноцифрена во последниот дел од премиерата во Матошинос. Напротив, ривалот дури и ја покачи, на средина од четвртиот период водеше со 77:59.

Марко Луканоски со 22 поени и девет скока беше нашиот најкорисен играч, Јаничиќ додаде 11 поени, а Шошкиќ, кој имаше проблеми со личните грешки низ целиот тек на мечот запиша 12.

В недела од 16.30 часот, Македонија ќе игра против репрезентацијата на Австрија, која по стартната победа на средбата со Норвешка (97:64), вечерва играше против Исланд. И на крајот стигна до втор триумф (82:72) кој ги става на делба на првата позиција со Велика Британија во групата „А“ по двете одиграни кола.