ЈП „Улици и патишта“ ги отстранува дефектите на семафорите низ Скопје
Екипите на ЈП „Улици и патишта“, одговорни за одржување на сообраќајната сигнализација на градските улици, деновиве интензивно ги отстрануваа дефектите и оштетувања на семафорите на крстосниците низ Скопје.
Интервенирано е на крстосниците на булевар Митрополит Теодосиј Гологанов со улица Московска, на булевар АСНОМ со булевар АВНОЈ 1 и АВНОЈ 2, каде имало оштетени лантерни на порталните семафорски столбови, кои се заменети.
Заменети се и старите семафорски уреди со нови на крстосницата на булевар Трета Македонска Бригада со улицата Фрањо Круз, додека пак на булевар Гоце Делчев кај МРТВ семафорскиот столб кој беше оштетен во сообраќајка е заменет со нов, а монтирани се и нови возачки и пешачки лантерни.
Дефектите на семафорите се случуваат од различни причини, од временските услови, несовесни возачи и сообраќајни незгоди, поради дотрајаност на опремата, поради исклучување на струјата итн – објаснуваат од ЈП „Улици и патишта“.
Оттаму објаснуваат дека и понатаму продолжуваат со редовната обиколка и контрола на светлосната сигнализација на градските крстосници.