Во ликовната галерија на Младинскиот културен центар (МКЦ) во Скопје, на 2 октомври беше отворена самостојната изложба „Откривање и ритам“ на мултимедијалниот уметник Мартин Џепароски.

Изложбата претставува поетска видео-инсталација составена од две интерповрзани видеа – „Откривање“ и „Ритам“ – кои се надополнети со просторна инсталација. Делото е сензорно доживување што го вклучува просторот како активен елемент, во кој се спојуваат визуелната уметност, звукот и движењето.

Преку симболична нарација, динамичен ритам и визуелна естетика, Џепароски ги истражува темите на внатрешното будење, трагањето по сопствената суштина и универзалниот ритам на животот.

Централниот елемент на изложбата – маслиновото дрво поставено во внатрешен простор – симболично поврзува природа и урбана реалност, материјалност и поетика.

Куратор на изложбата е Марија Коробар, музиката е на Горан Атанасовски – Роботек, а дизајнот на каталогот и визуелниот идентитет е дело на Василија Чали.

Проектот е реализиран со поддршка од Министерството за култура и туризам на Република Северна Македонија, во рамки на годишната програма за визуелни уметности, архитектура и дизајн за 2025 година.

Изложбата е отворена секој ден до 10 октомври и нуди ретка можност за интроспективно и мултисензорно уметничко доживување.

Мартин Џепароски (роден 1991, Скопје) е мултимедијален уметник чија практика опфаќа скулптура, видео-инсталации и дигитални концепти. Дипломирал вајарство и сценографија на Факултетот за ликовни уметности во Скопје, во класата на проф. Ибрахим Беди. Неговото уметничко истражување е насочено кон односот меѓу човекот, природата и урбаната реалност, испитувајќи ги начините на кои овие димензии се вкрстуваат, коегзистираат и меѓусебно се трансформираат.

Комбинирајќи традиционални методи со современи техники, Мартин развива препознатлив визуелен јазик кој ја поврзува материјалноста и симболизмот. Неговите дела честопати ги повикуваат гледачите на интроспективно и сензорно доживување, каде што се спојуваат поетската експресија и концептуалната истражувачка мисла. Преку овој мултидисциплинарен пристап, тој постојано ги проширува можностите на визуелното раскажување, позиционирајќи ја својата практика во рамките на локалниот и на меѓународниот современ уметнички дискурс.