Косовските граѓани со право на глас ќе можат утре (недела, 14 февруари) да гласаат на вонредните парламентарни избори, додека изборниот молк за политичките субјекти кои се натпреваруваат на овие избори започна синоќа на полноќ и ќе трае до затворањето на гласачките места, утре во 19 часот, јави дописникот на МИА од Приштина.

Официјалната кампања за овие, осми по ред, повеќепартиски избори во повоено Косово, започна на 3 февруари, а за следење на изборниот процес се акредитирани околу 20 илјади набљудувачи, кои доаѓаат од политички субјекти, медиуми, амбасади, невладини организации и други организации.

На годинешните општи избори учествуваат 28 политички субјекти сертификувани од Централната изборна комисија (ЦИК), при што нема ниеден независен кандидат.

За 120 места во косовскиот Парламент се натпреваруваат 1.068 кандидати.

Право на глас, според конечниот список на гласачи што го објави ЦИК, имаат 1.794.862 лица, што е за 143.006 помалку во споредба со последниот изборен процес во земјата – вонредните парламентарни избори од 6 октомври 2019 година. Намалувањето на бројот на лица со право на глас се должи пред се на бришењето од гласачкиот список на над 122 илјади граѓани кои поседуваат единствено лични документи издадени од УНМИК, а во меѓувреме починале и нешто повеќе од 11 илјади лица.

Оценка на медиумите и набљудувачите е дека кампањата помина мирно и без инциденти, со одредени прекршувања на изборниот кодекс, како што е употребата на деца во кампањата, притисоци врз гласачите да гласаат за одредени субјекти, истакнување изборни плакати на јавни места и слично.

Најмногу забелешки, а и парични казни за политичките партии, имаше поради непочитување на Законот за превенција и борба против Ковид-19 на предизборните митинзи.

Овие вонредни парламентарни избори во Косово ќе се одржат откако во ноември минатата година Уставниот суд го оспори легитимитетот на Владата на Авдулах Хоти, затоа што за нејзиниот избор гласал еден пратеник кој немал право да биде член на законодавниот дом поради правосилна казна со затвор во последните три години. Гласот на спорниот пратеник, кој беше од партиите на помалите етнички заедници, беше 61-от глас за кабинетот на Хоти, а со неговото поништување се изгуби и мнозинството за изгласување на Владата.