Неделава еко-патролата на ЈП „Комунална хигиена“ врши надзор врз неколку микролокации на улицата Петар Манџуков во скопската општина Бутел, каде што е забележано континуирано непрописно одлагање отпад на јавни површини. Оттаму информираат дека се реализирани едукативно-информативни активности со повеќе лица коишто се забележани при кршење на Законот за јавна чистота, кои фрлале ѓубре надвор од контејнери.

Во три општини пак, се исчистени неколку диви депонии, од каде се подигнати вкупно 45 кубни метри отпад – во близина на Македонска куќа во општината Карпош, на улицата Славеј Планина во општината Чаир, како и на повеќе локации во општината Кисела Вода.

Екипите на ЈП „Комунална хигиена“ деновиве го подигнуваа и го транспортираа и селектираниот отпад од специјалните садови наменети за одлагање стакло, картонска и пластична амбалажа, поставени на територијата на Скопје.