Претседателот на Синдикатот на контролори на летање Александар Тасевски, доцна попладнето бил повикан во полиција да даде изјава, откако двајца директори на македонската навигација (М-НАВ) се пожалиле дека им се заканувал на Фејсбук. Двајца од директорите го пријавиле Тасевски во полиција затоа што се чувствувале небезбедно.

Тасевски вели дека не им се заканувал туку дека ги откривал злоупотребите на раководителите за новите вработувања.

„Почнаа да се будат ‘човечињата’. Редно е да се разбуди и ОЈО па да почне да чепка и за ова и за тендери и за реновирања на гаража, ќе има работа за до пензија“, напиша Тасевски на својот фејсбук профил пред три дена споделувајќи новинарски напис за оставките на сите инженери од раководните инструкторски места како и еден од тројцата директори на М-НАВ Љубе Стаменковски.

Тасевски ја потврди информацијата и најави дека деталите во јавност ќе ги соопшти утре на прес-конференција.

МНАВ: Тенденциозни се нападите кон нас, вработувањата се според истите критериуми како и претходно