Хрватска воведува посебно кривично дело „тешко убиство на жена“, во Македонија за четири години имало дваесетина случаи на фемицид
Хрватска соопшти дека воведува нови мерки и построги казни за борба против насилството врз жените, како и специјалното кривично дело тешко убиство на жена. „Приоритет е построго казнување на насилството и зајакнување на правата на жртвите“, рече премиерот Андреј Пленковиќ на презентацијата на мерките на средбата со претставници на институции и здруженија на граѓани во Загреб.
Станува збор за измени на повеќе закони, а меѓу новитетите, покрај кривичното дело фемицид, има и притвор за прекршување на заштитните мерки, повисоки казни за силување и информирање на жртвата за ослободување на сторителот.
„Одлучивме да испратиме јасна и недвосмислена порака до сите сегменти на општеството дека е неприфатливо да се убива жена, бидејќи е жена. Затоа воведуваме посебно кривично дело – тешко убиство на жена, фемицид, за кое ќе се казни со затворска казна од најмалку десет години до долготраен затвор“, рече Пленковиќ.
Со измените и дополнувањата на повеќе закони, меѓу другите, Кривичниот законик, Законот за заштита од семејно насилство, Законот за судовите и Законот за семејство, се укинуваат застареноста на сите тешки кривични дела сексуална злоупотреба и експлоатација на деца, се воведува правото на жртвата да поднесе жалба против решението за заштитна мерка, а полицијата добива овластување да го приведе насилникот кога постои сомневање дека е прекршена мерката.
Измените на законот ќе бидат пуштени на јавна расправа до крајот на следната недела за да бидат усвоени на почетокот на 2024 година. Граѓанските здруженија и Народниот правобранител за родова еднаквост ги поздравија најавените мерки.
Во Северна Македонија од 2019 година досега евидентирани се дваесетина случаи на фемицид . За четири години се покренати 17 кривични постапки за фемицид, во кои се убиени 19 жени. Повеќето од жртвите настрадале од раката на своите поранешни или сегашни партнери или сопружници, а убиствата најчесто се случиле во нивните домови, покажува најновиот извештај за фемицид во Северна Македонија.