Весна Новосел од Хрватска пронашла питон на улица, го ставила во кутија и го однела дома. Потоа почнала да ги повикува здруженијата за животни да најдат место за питонот, пренесува „Телеграф.рс“.

– Се шетав со моето куче во Славонски Брод. Видов момче и девојка кои ги запреа велосипедите и гледаа во нешто. Дојдов поблиску до нив и го прашав момчето дали му паднало нешто, тој само покажа со раката на тротоарот. Имав што да видам, змија со прекрасни шари насукана како пита. Кога се приближивме, ја сокри главата, најверојатно тоа е нејзиниот начин да се заштити. Змијата беше на тротоарот веднаш на влезот во дворот на зградата. Се плашам да помислам што ќе се случеше ако некој излезеше или влезеше во дворот со автомобил – изјавила Новосел, пренесува „24сата.хр“.

Жената потоа направила нешто мошне храбро. Таа го однела питонот дома.

– Во дворот имаше еден господин со автомобил, го замолив да ми даде ракавици и најдовме картонска кутија во која го ставив питонот. Го донесов во станот, се јавив во Здружението за змии и ми рекоа дека тие не се одговорни за градот, но дека има друго здружение каде што треба да се јавам, мислам дека се вика „Сколари“ и љубезно ме упатија во службата 112, кои ми рекоа да ја однесам змијата во засолништето во ЗОО.  Така и направив. Многу ми е мило што го спасив животното, едвај би преживеала во овие сè поладни ноќи и без храна – рекла таа.

Младиот питон е во ЗОО во Русчица, а Мирко Милец, сопственик на ЗОО, веќе му подготвува сместување каде што температурата мора да биде околу 30 степени.

– Станува збор за млад питон, според моја процена, стар е меѓу две и три години. Мислам дека може да биде и бурмански питон, кој нема да порасне уште многу. Претпоставувам дека бил нечиј миленик, дека избегал од својот сопственик или дека сопственикот намерно го ослободил, се сомневам дека сопственикот ќе се јави, бидејќи очигледно незаконски го чувал – рекол Милец.