Холандски суд и нареди на владата да престане да испорачува делови за борбените авиони Ф-35 што Израел ги користи при бомбардирање на Појасот Газа, пренесува Ал Џезира.

Наредбата следува по жалба на организации за човекови права против пресуда на понизок суд со која се отфрла нивниот аргумент дека испораката на делови придонела за кршење на меѓународното право.

Организациите за човекови права во Холандија минатата година ја обвинија владата за соучесништво во, како што рекоа, воените злосторства извршени од Израел за време на војната во Газа, поради извозот на делови за борбени авиони Ф-35.

Амнести интернешенел и Оксфам во Холандија тврдат дека пратките „придонеле за широко распространето и сериозно кршење на хуманитарното право од страна на Израел во Газа“.

Во декември, судот го отфрли случајот и рече дека на владата мора да ѝ се даде голема слобода кога одлучува за политичките прашања за извозот на оружје.

Меѓутоа, апелациониот суд денеска и нареди на владата да го блокира целиот извоз на делови за борбени авиони Ф-35 во Израел во рок од седум дена.

„Неоспорно е дека постои јасен ризик извезените делови на Ф-35 да се користат во сериозни прекршувања на меѓународното хуманитарно право“, наведе судот.

Израел постојано ги негираше обвинувањата дека извршил воени злосторства за време на својата воена операција во Газа. Меѓутоа, Меѓународниот суд на правдата во јануари го повика Израел да се воздржи од какви било активности во енклавата што би можеле да претставуваат геноцид.

Министерството за здравство во Појасот Газа, управуван од Хамас, денеска соопшти дека најмалку 28.340 луѓе досега биле убиени на опколената територија за време на војната.