Група за киберкриминал украла, а потоа препродала повеќе од 900 дигитални билети за концерти на американската пејачка Тејлор Свифт и други концерти на „СтабХаб“ (StubHub), соопшти обвинителството во Њујорк.

Окружниот обвинител на Квинс Мелинда Кац рече дека меѓународната измама вклучува луѓе кои работат во Јамајка за фирма која се занимава со онлајн продажба на билети, објави „АП“.

Според обвинителите, криминалната група заработила повеќе од 600.000 долари меѓу јуни 2022 година и јули 2023 година.

Повеќето од украдените билети биле за концертите на Свифт, но биле украдени и за концертите на Адел и Ед Ширан, како и за натпреварите во НБА и тенискиот шампионат во САД.

Кац истакна дека истражителите сè уште го утврдуваат обемот на операцијата, вклучувајќи ги и другите потенцијални соучесници.

Двајца од инволвираните, Тајрон Роуз и Шамара Симонс, биле уапсени и обвинети минатиот четврток за голема кражба, компјутерски манипулации и обвиненија за заговор, соопшти канцеларијата на Кац.