Најдобрата македонска машка одбојкарска сениорска репрезентација во Беверен имаше нови настапи во рамките од Европската златна лига каде запиша триумф над Азербејџан (3:0), а загуби минимално (3:2) од домаќинот Белгија.

На враќање во нашата земја летот од Цирих до Скопје на избраниците на селекторот Хари Наковски беше запрен откако гром удри во нивниот авион за време на летот, пренесува „ЕКИПА“.

Како што вели изворот, пилотот реши веднаш да се врати назад во Цирих, Швајцарија, каде принудно слета, за среќа без посериозни проблеми.

Нашите одбојкари веќе се сместени во хотел и утре наутро со нов лет ќе тргнат кон Скопје.

– Навистина неверојатна ситуација, додека летавме со авионот удри гром во него и пилотот реши да се врати во Цирих. Не беше пријатно кога слушнавме што се случи, видовме силна светлина во непосредна близина – вели за ЕКИПА капитенот Никола Ѓоргиев.