Селекторот на грчката ракометна репрезентација Јоргос Заравинас во пресрет на мечевите на Грција со Македонија ги најавува пријателските средби на официјалната интеренет страница на Грчката ракометна федерација, нарекувајќи ја нашата земја „Скопје“.

– Сега во Солун ја водиме првата недела на подготовките за нашиот нов потфат, нашето учество на ЕУРО. Оваа фаза е важна за нас и ние ќе играме две силни официјални пријателски средби со Скопје. Вредно е за нас да имаме силни пријателски средби против земји што во последниве години биле постојано присутни во финалните фази од европските и светските шампионати. Ќе испробаме некои работи, ќе консолираме некои наши посилни особини и ќе се обидеме да вклучиме некои нови имиња поврзувајќи го сениорскиот национален тим со јуниорскиот национален тим што учествуваше минатото лето на светското првенство. Сениорскиот тим мора да биде отворен за младите кои си бараат место. Нашиот следен собир ќе биде на 16-17 декември во последната фаза од подготовките – е целосниот пасус од изјавата на грчкиот селектор кој ги најавува средбите со Македонија, што тој ја нарекува „Скопје“, на официјалната страница на Грчката ракометна федерација.

Линк од текстот објавен на споменатата интеренет страница на 30 октомври. Во претходните два текста на овој сајт, кои се објавени на 30 октомври и на 26 октомври, а посветени на собирот на грчката репрезентација, пријателските мечеви се најавени како средби со тимот на Северна Македонија.

Заравинас (47) е некогашен ракометар, а од 2014 се занимава со тренерскиот занает. Селектор на Грција е од 2021 година.

Инаку, двата пријателски меча Грција – Македонија ќе се играат во Солун в петок и в сабота, како дел од ЕХФ-неделата.

Грција првпат ќе учествува на европско првенство, а за Македонија, која на европските првенства дебитира во 1998 година, учеството на ЕП 2024 ќе биде осмо, а седмо во низа.