Газдите текстилци со нови барања: Да се продолжи работното време и да се укинат празниците или ќе штрајкуваат
Сопствениците на текстилните фабрики здружени во Текстилниот кластер бараат вработените во нивните фабрики да работат 8 и пол часа, така што да може паузата од половина час да им биде платена, објави „Фактор“.
Според писмо кое го испратиле до министерките за труд и социјална политика и за финансии Мила Царовска и Нина Ангеловска, но и до вицепремиерот Кочо Анѓушев, тие образложуваат дека сегашното работно време од осум часа односно од ефективни 7 и пол часа, затоа што работниците имале и платена пауза, ги правеле фабриките неконкуретни во однос на тие од регионот.
Меѓу барањата е и да се укинат празници за да нема дисконтинуитет во производството, односно работниците повеќе да работат.
Сопствениците на текстилните фабрики имаат и други барања, а најавуваат и штрајк, така што ќе го искажат своето незадволство од условите за водење бизнис во земјата.
Тие тврдат дека има ниска продуктивност и дека државата декларативно се заложува за раст на платите кој генерално паѓал на грбот на работодавачите.
Според последните податоци, во текстилната индустрија во земјава се вработени над 36.000 луѓе.