Гастрономско уживање од вештите раце на Бобе Јанкоска: Кантучи
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Препорачано
Бобе денеска споделува рецепт за вистински гурмански деликатес: кантучи.
– Во светот на слатките задоволства, некои рецепти не се само десерт – тие се доживување, патување и традиција спакувани во секое залче. Таков е и рецептот за кантучи – прочуените италијански колачиња, познати по својата крцкавост и богатство од вкусови. Совршени се за натопување во кафе, чај или дури и во чаша сладок ликер, а нивниот мирис и текстура носат дел од Тоскана директно во вашиот дом. Ако сакате да внесете доза европски шмек и празнична топлина во вашата кујна, пробајте го следниот рецепт – порачува Бобе.
Состојки:
– 400 грама брашно
– 200 грама шеќер
– 3 јајца
– 80 грама омекнат путер
– ½ лажичка сода бикарбона
– 10 мл ликер по ваш избор
– 100 грама лешници
– 100 грама бадеми
– 1 лажица течна ванила
– 2 лажици какао
– 1 лажица цимет
– ¼ лажичка ѕвезда (анис)
– ¼ лажичка махлеб
Подготовка:
Во длабок сад измешајте ги брашното, шеќерот, сода бикарбоната, какаото, циметот, звездата анис и махлебот. Овие зачини ќе ѝ дадат на смесата топла, благо зачинета арома.
Во сувата смеса додајте ги јајцата, омекнатиот путер, ванилата и ликерот. Замесете сѐ додека не добиете хомогена и мазна смеса. Додајте ги лешниците и бадемите, претходно малку потпечени за посилен вкус. Тестото ќе стане богато и малку поцврсто – токму како што треба. Поделете го тестото на три еднакви дела и оформете долги, тенки ролати. Наредете ги на хартија за печење. Ставете ги во претходно загреана рерна на 180 степени Целзиусови и печете околу 25-30 минути, сè додека не добијат убава кора. Извадете ги и додека се топли, внимателно исечете ги на коси парчиња со дебелина 1,5-2 см – карактеристичниот изглед на кантучи. Вратете ги исечените парчиња во рерната и допечете уште 10 минути, додека не добијат златно-кафеава боја и совршено крцкава текстура.
Чувајте ги кантучите во стаклена тегла – така ќе останат свежи и крцкави со денови, а секојпат кога ќе ја отворите, ќе ве пречека нивната неодолива арома.
На здравје!
