Во присуство на претседателот на Демократската унија за интеграција, г. Али Ахмети, приватните донатори ‘Ефтинија Импекс’ и ‘Темпо профили’, наставници и родители на ученици, денес градоначалникот на Чаир, Висар Ганиу го посети новиот анекс на училиштето ‘Исмаил Ќемали’ во Чаир.

Ганиу при тоа рече дека активностите кои што имаат врска со проширување на објективните капацитети за развој и напредок на училишното образование се посебен предизвик за сите градоначалници.

‘Обезбедувањето модерни и современи услови за едукација и образование е основно човеково право и цивилизиран стандард за да им се овозможи на новите генерации, вистинскиот интелектуален багаж и одредени вештини, тие да се подготвени во големиот глобален натпревар на науката и технологијата’, изјави Ганиу.

Го проширивме капацитетот, додаде Ганиу, на Основното училиште „Исмаил Ќемали” каде што изградивме вкупно 580м2 училишен простор, односно, два ката со по 290м2, вклучувајќи и тоалети. Ова проширување ќе му овозможи на ова училиште, кое е толку фреквентно, да дише послободно и да има подобра распределба на учениците во училниците.

Училниците се изградени со висок квалитет и во согласност со модерните стандарди за проектирање и градба.

‘Дозволете ми да им се заблагодарам за сиот овој придонес на компаниите: „Ефтинија импекс” и „Темпо профили” кои дадоа многу вреден и примерен придонес за секој граѓанин на Чаир’, рече апелирајќи до бизнис заедницата да го следат овој пример на општествена одговорност, и да покажат и подготвеност да инвестираат во јавни простори, образовни, во делот на животната средина и други области.

Градоначалникот на Чаир, и најсериозен кандидат за нов мандат информираше дека во тек е реализацијата на детската градинка во Тенеќе маало во вредност од 2 милиони евра, а во истата населба е предвидено да се изгради ново основно училиште во вредност од 3,5 милиони евра, проширување на капацитетот на неколку училишта, како и изградба на библиотека и читална во Сахаткула кај Иса Бег, во вредност од 850 илјади евра.

Извор: МИА