Македонските одбојкари загубија со 3:0 (25:12, 25:21, 25:14), но не се посрамотија против моќната Полска во третиот настап на ЕП 2023 во Скопје.

Засега сè е според планот, победивме над Данска и над Црна Гора за моментно шест бода, така што отворена ни е вратата кон осминафиналето во Бари, Италија.

Во вторник ќе играме против Холандија од 17.00 часот, а в среда од 20.00 часот со Чешка за што подобар пласман во рамките од групата „Ц“.

ФОТОГАЛЕРИЈА | Македонија вкуси како е да се игра против светска велесила во одбојката

И денеска играчите на Јошко Миленкоски имаа гласна поддршка од македонските навивачи кои заедно со полските направија одлична атмосфера во СЦ „Борис Трајковски“.

Овие денови се сака, се живее за одбојката, нека продолжат да грмат нашите верни одбојкарски и спортски фанови во нашата најголема сала, нека ги има во што поголема број и на последните два меча од групната фаза.

Повеќе информации околу цените на влезниците на продажната мрежа на „МкТикетс“ на линкот ТУКА. Дојдете и навивајте кон нови победи на најдобрата македонска машка одбојкарска репрезентација.

– Видовме дека Полјаците се професионалци, го даваат максимумот и ја гледаат само нивната игра. Ние дадовме добар отпор, имавме резултски егал во тие клучни моменти од вториот сет, но нивното ниво се покажа како пресудно. Можевме да одиграме подобро на моменти, игравме против светски шампион, се надевам дека на следните два меча ќе влеземе мотивирано и да оствариме победа. Не велам дека се слаби Холандија и Чешка, треба да се даде 120% доколку сакаме добар резултат. Ова не е нашиот максимум, верувам можеме да пружиме уште добри игри да ја израдуваме Македонија – изјави еден од најискусните македонски одбојкарски репрезентативци, Владо Милев за МТВ по завршувањето на мечот со Полска.