Рускиот министер за одбрана Сергеј Шојгу го посети воениот космодром, додека еден од неговите заменици беше испратен во истражен затвор под обвинение за поткуп.

Висок руски воен функционер, уапсен под сомнение за примање поткуп, бил испратен во истражен притвор во средата откако се појавил пред судот во центарот на Москва, се вели во соопштението на судските власти.

Тимур Иванов (48), еден од 12-те заменици министри за одбрана на Русија, беше санкциониран од САД и од Европската унија во 2022 година, откако Русија испрати војници во Украина.

Судот во Басмани го осуди Иванов на два месеци затвор во очекување на истрагата, се вели во соопштението на прес-службата на судовите во Москва.

Според истражителите, Иванов е обвинет за земање особено голем поткуп – кривично дело за кое е предвидена казна затвор до 15 години.

Државната агенција ТАСС јави дека Иванов не признал вина.

Судот во Басмани го уапси и Сергеј Бородин, кој исто така е обвинет за истото дело.

Според веб-страницата на Министерството за одбрана, Иванов беше назначен на функцијата во 2016 година со претседателски указ и го надгледуваше управувањето со имотот, домувањето и медицинската поддршка за војската, изградба и реконструкција на објекти.

Руските медиуми тврдеа дека тој бил задолжен, меѓу другото, и за дел од градежните работи во Мариупол.

Руски официјален ТВ канал на руската војска, летото 2022 година објави дека Министерството „гради цел станбен блок“ во тешко оштетениот град, а на снимките го покажа токму Иванов како ги проверува градилиштата.

Истата година, тимот на покојниот Алексеј Навални, најистакнатиот руски опозициски лидер и борец за борба против корупцијата, тврдеше дека Иванов и неговото семејство живееле екстравагантен живот полн со луксузни патувања во странство, раскошни забави и елитен недвижен имот.

Руската државна новинска агенција РИА Новости го цитираше портпаролот на Кремљ, Дмитриј Песков, кој рече дека и претседателот Владимир Путин и министерот за одбрана Сергеј Шојгу биле информирани за апсењето на Иванов, што доаѓа додека војната на Москва во Украина продолжува во третата година.

Пред неговото апсење во вторникот вечерта, Иванов беше виден како присуствува на состанок со Шојгу и други врвни воени лица.

Паралелно руското Министерство за одбрана пак денеска објави видео на кое се гледа како Шојгу го обиколува космодромот Плесецк во регионот Архангелск и го проверува производството на ракети Ангара.