Новата скулптура, за која се верува дека е прва од ваков вид во светот, е дизајнирана да ги слави жените кои носат хиџаб.

Уметничкото дело, наречено „Силата на хиџаб“, е дизајнирано од Лук Пери и ќе биде инсталирано во областа Сметвик во Западен Мидлендс во октомври, пишува „Би-би-си“ (BBC).

Се верува дека тоа е првата скулптура на жена која носи традиционална муслиманска покривка за глава. Скулптурата е висока пет метри и тежи околу еден тон.

„’Силата на хиџабот’ е парче што ги претставува жените од исламска вероисповед кои носат хиџаб и оваа скулптура е направена бидејќи хиџабот е недоволно застапен дел од нашата заедница, но сепак толку важен“, изјавил дизајнерот на скулптурата Лук Пери.

Иако г-дин Пери признал дека новата скулптура може да биде „контроверзна“, тој изјавил дека е важно да се претставуваат сите што живеат во Обединетото Кралство.

„Постои можност ова парче да биде контроверзно од многу различни причини. Не чувствувам дека ниту една од нив е валидна, но има многу луѓе кои се противат на разликите што ги имаме во нашите заедници и би сакале да бидат поделени.

Но, иднината на нашата земја е она што не обединува, а не она што нѐ разделува, затоа е важно да имаме застапеност низ целото ОК, на сите што живеат овде“, вели Лук Пери.