Од Општина Центар информираат дека до Амбасадата на Република Австрија во земјава испратиле протестна нота потпишана од градоначалникот Горан Герасимовски поради тоа што нивен автомобил со дипломатски таблички бил непрописно паркиран и блокирал пешачка зона во Капиштец.

„Општина Центар упатува најостар протест поради непрописното паркирање на дипломатско возило на австриската амбасада со регистарски таблици 22-CMD-01, кое на 8 октомври 2025 година (среда) било паркирано во пешачка зона во паркот во населбата Капиштец, во близина на улицата Народен фронт, наспроти угостителскиот објект „Интермецо“, се вели во протестната нота.

Оттаму додадоа дека и покрај дипломатскиот статус на возилата, почитувањето на локалните прописи и правилата за јавен ред и безбедност е основен принцип што важи за сите, вклучително и за дипломатските претставништва во Македонија и побара од Министерството за надворешни работи да ја извести Амбасадата на Република Австрија и да преземе соодветни дипломатски мерки за спречување на вакви случаи во иднина.