На Клиниката за инфективни болести примени се пет нови пациенти. Сега вкупно има 68. Со потешка здравствена состојба се 20 пациенти, од кои 7 се во критична фаза и се приклучени на респираторни машини. Хоспитализирана е и мајка и четиримесечно бебе. Тие имаат стабилна клиничка слика и постојано се под надзор. Денеска кај четворица кои се лекуваат на Клиниката се чека да пристигне и вториот контролен тест и ако и тој е негативен тие ќе бидат пуштенина домашно лекување, изјави на денешната прес конференцијата министерот за здравство Венко Филипче.

– Дваесет и пет пациенти има во болницата „8 Септември“ и шест од нив се во тешка состојба и се на респираторни машини приклучени. Во болницата во Битола тројца се во стабилна состојба од четворица вкупно хоспиртализрани, а во Штип има четворица се хоспитализирани. Во изминатите 24 часа направени се 341 тестирање, а до денес направени се вкупно 6.571 тестови. Денеска во Министерство за здравство се отвараат понудите за набавката на респираторните машини и во тек се постапки за набавка на реагенси и заштишта опрема. Денеска ја објавивме и листата на донатори, а на сметката на која се собираат донации има 60 милиони денари. Од Домот за стари лица во Битола има еден штитеник кој болнички згрижен и тој е позитивен на Ковид-19. Во двете институции се дадени насоки за темелно чистење на просториите – рече Филипче.

Тој нагласи дека мерките кои ги спроведувале се најстроги, но се подготвувале и за периодот кон крајот на април кога се очекува да биде пикот на болеста. Нагласи дека постепено животот нема наеднаш да се врати во нормала бидејќи секогаш постои ризик и за втор пик.

– Ги повикува граѓаните да ги почитуваат сите мерки. Блиску сме до целта, а таа да е да го спречиме ширењето на вирусот – нагласи Филипче.